Un mas patrimouniau entre Aupiho e Leberoun
L’Óusservatòri de la lengo e de la culturo prouvençalo, cèntre culturau prouvençau es aculi dins lou Mas Sant-Pau, oustau patrimouniau mes à dispousicioun pèr la coumuno de Chivau-Blanc. Lou Mas Sant-Pau es un bèl eisèmple de fermo tradiciounalo prouvençalo de la plano. Aquéu mas famihau es de la fin dóu siècle XVIII pèr sa partido la mai anciano. Lis obro de renouvacioun fuguèron finançado pèr la Regioun Prouvènço-Aup-Coustiero d’Azur, emé l’ajudo d’àutri couleitiveta territourialo pèr ço que toco lis equipamen (despartamen de la Vau-Cluso, di Bouco-dóu-Rose, e tambèn de coumuno noumbrouso) e’mé l’ajudo di ciéutadan via la Foundacioun dóu Patrimòni, e dóu mecenat (Foundacioun d’Entrepreso dóu Crèdi Agricolo Aup-Prouvènço, Doumaine de Mejano).
Es lou 24 d’óutobre de 2020 que l’Óusservatòri de la lengo e de la culturo prouvençalo fuguè inagura pèr lou Presidènt de Regioun, Renaud Muselier, en presènci d’un fube d’elegi e representant d’assouciacioun de culturo prouvençalo.
L’Óusservatòri de la lengo e de la culturo prouvençalo es la resulto dóu travai dóu Couleitiéu Prouvènço, que fuguè à l’iniciativo dóu proujèt i’a mai de dès an d’acò e cepoun de sa realisacioun. Lou Couleitiéu Prouvènço a mes dedins tóuti si dardèno e sis ajudo bountouso pèr que siegue realisa aquest ourganisme culturau e soun founciounamen.
L’Óusservatòri de la lengo e de la culturo prouvençalo es tras-que bèn situa, dins lou Pargue Naturau Regiounau dóu Leberoun e proche aquéu dis Aupiho, em’un abord bèn prati à la sourtido de l’autorouto A7 via lou pont tout nouvèu qu’escambarlo Durènço à Cavaioun.
Lou Mas Sant-Pau, lega pèr Pauleto
Dóumaci lis enfourmacioun que Lucian Calviere, Presidènt de l’assouciacioun de Castèu-Reinard l’Escolo Felibranco Marius Chabran nous baiè, n’en sabèn un pau mai sus la rèiro prouprietàri dóu Mas Sant-Pau. Bello Coumtadino que devenguè coumtesso de pèr soun maridage, èro nascudo Paulo Marìo Claro Mignucci lou 13 de Mars de 1905, à Marsiho, aquelo que, dins sa famiho, ié disien d’un biais tendrinèu Pauleto, èro la chato de Moussu e Dono Mignucci (lou noum de jouino fiho de sa maire èro Liens).
Fasié partido de la darriero generacioun que tenié lou prouvençau dóu brès. Soun maridage emé lou Comte Gui Emilo Jan Truitié de Vaucresson, que davalavo d’uno lignèio d’óuficié de l’armado, vai pas l’empacha de resta touto sa vido estacado i coustumo de sa Prouvènço, fin qu’à sa mort lou 28 de Jun de 1988.
Coume avié ges de descendènt en lignèio dirèito, baiè lou Mas Sant-Pau à la coumuno, dins l’idèio de crea un oustau de retirado, un biais de moustra soun afecioun pèr Chivau-Blanc. Mai coume lou proujèt d’oustau de retirado èro dejà engaja autro-part, emé lis eiritié fuguè di que lou Mas Sant-Pau sarié pèr uno bono obro toucant la culturo. Es ansin que lou conse de Chivau-Blanc, Crestian Mounier, emé l’acord de soun Counsèu Municipau, fuguè tout dispausa pèr aculi dins aquest endré l’Óusservatòri de la Lengo e de la Culturo Prouvençalo.
